Четврток, 22 октомври 2020 година

Воведен состанок за корисници на грант од КА102

На 20 октомври се одржа воведен состанок за корисници на грант од програмата Ерaзмус+ за полето стручно образование и обука КА102. На состанокот присуствуваа корисници, од целата република, кои добиле грант од КА102 за 2020 година.

Состанокот го отвори програмскиот службеник за КА102, Марија Стефковска, вработена во Националната агенција за европски образовни програми и мобилност, која на корисниците им ги презентира правилата за имплементација на проектите за мобилност во стручното образование и обука.

Таа во обраќањето обрна внимание на следните аспекти: управување со грант, проектен циклус, потпишување на договор, начин на исплата, реализирање на мобилноста, активности што треба да се направат пред мобилноста, активности што треба да се направат во текот на мобилноста, активности што треба да се направат после мобилноста, финален извештај, алатки, обврски на корисници, трошоци кои не се признавааат и мобилност во време на КОВИД 19.

По завршување на излагањето на Стефковска имаше повеќе прашања на кои беше соодветно одговорено.

На корисниците, во продолжение на воведниот состанок, од страна на експертката Сузана Станковска им беше презентиран системот за Европски кредит трансфер систем за стручно образование  и обука – ЕКВЕТ.

Експертката ја објасни примената и значењето на ЕКВЕТ и методологијата на пресметување на поени и кредити во средното стручно образование и обука, кој е наменет за учениците и како тој би им послужил во нивното понатамошно образование, работа и кариeра.

На воведниот состанок, исто така, се одржа презентација за новата платформа на европската мрежа ЕВРОПАС, при што се обрна посебно внимание на документот Европас мобилност.

Презентацијата ја одржа Анабела Димоска, вработена во Европас центарот при Националната агенција за европски образовни програми и мобилност, која во своето излагање ги запозна корисниците со можностите што се нудат во новата платформа: како корисниците да се регистрираат на Европас платформата за да направат свој профил и притоа да ги користат документите што им се на располагање.

Во презентацијата стана збор и за документот Европас мобилност, кој корисниците треба да го користат за времетраењето на нивната мобилност.

Воведниот состанок, кој се одржа според сите протоколи, активни мерки за заштита во услови на КОВИД 19, беше  успешен и со достојна посетеност, при што корисниците активно зедоа учество со свои прашања и предлози.