Настан за сите кои работат на темите инклузија и разновидност во младинскиот сектор. ID Forum ќе обедини 150 учесници за споделување искуства, меѓусебно учење и развој на идеи за да се направат ЕУ младинските програми поинклузивни и подостапни за сите.

ШТО ПРЕТСТАВУВА ОВАА АКТИВНОСТ?

Форумот за инклузија и разновидност (ID Forum) стана централна европска платформа за истражување на инклузијата и разновидноста во рамки на ЕУ младинските програми. Организиран во клучни моменти, Форумот обезбедува простор за рефлексија, дијалог и креирање визија за иднината.

Со приближувањето кон крајот на програмскиот период 2021–2027 на Еразмус+ 2026 година претставува важен момент за осврт кон постигнатото и за утврдување што сè уште треба да се подобри во Стратегијата за инклузија и разновидност. Воедно, Форумот ќе придонесе кон обликување на следната генерација на ЕУ младински програми (2028–2034). Ќе се истражува и поврзаноста на инклузијата и разновидноста со други приоритети на ЕУ. Младите низ Европа денес се соочуваат со бројни предизвици – ментално здравје, дигитален јаз, несигурност на работните места, недостапно домување, климатска анксиозност и зголемен притисок врз демократските вредности. Овие предизвици влијаат врз учеството, благосостојбата и еднаквите можности. Форумот ќе истражува како европските младински програми можат да одговорат на овие реалности и да придонесат кон поправедно и поинклузивно општество.

По три успешни изданија, ID Forum продолжува да расте, градејќи врз досегашните сознанија, влијание и искуства, со цел создавање позначајна, подостапна и поинклузивна Европа.

ТЕМАТА НА НАСТАНОТ е:„МАКСИМИЗИРАЊЕ НА ВЛИЈАНИЕТО“

Како европските младински програми и проекти можат да создадат значајна и долгорочна промена во областа на инклузијата и разновидноста?

Како да ja обезбедиме нашата работа:

• да допре до повеќе млади луѓе,
• да создава одржливи промени во организациите и заедниците,
• и да има долгорочно влијание надвор од рамките на еден проект?

Преку панел-дискусии, тркалезни маси, студиски посети и работилници, учесниците ќе истражуваат практични примери и заеднички ќе развиваат нови идеи.

Општа цел:

Да се зајакне инклузијата и разновидноста во ЕУ младинските програми преку поврзување на луѓе, споделување знаење и градење соработка помеѓу засегнатите страни активни во областа на инклузија и разновидност во рамки на ЕУ младинските програми.

Цели:

• Да се направи осврт и да се извлечат поуки од тековната Стратегија за инклузија и разновидност и ЕУ младинските програми (2021–2027) – што функционирало добро и што може да се подобри.
• Заеднички да се обликува иднината преку истражување како следните ЕУ младински програми (2028–2034) можат подобро да ги вклучат и поддржат младите со помалку можности, и како Стратегијата за инклузија и разновидност може реално да влијае врз нивните животи.
• Да се истражи поврзаноста помеѓу инклузијата и разновидноста и денешните предизвици, како ментално здравје, дигитален јаз, климатски промени и закани за демократијата, како и новите ЕУ стратегии и да се размисли како младинските програми можат да придонесат за поправедно и поинклузивно општество.

Пристап и методологија

Форумот ќе користи методи на неформално образование, вклучувајќи:

• Учење и размена,
• интерактивни работилници,
• групна работа и рефлексија,
• сесии со работилници,
• пленарни сесии,
• панел-дискусии,
• учење од локални инклузивни практики.

Програмата ќе се базира на искуствата и знаењата на учесниците. Можно е да бидете поканети активно да придонесете пред или за време на Форумот преку споделување практика, водење сесија или учество во дискусии.

Целта е самиот форум е да биде пример за инклузивна практика што учесниците ќе можат да ја применат во сопствената работа.

Учесници

За кого е наменет Форумот?

ИД Форумот ќе обедини околу 150 учесници од различни улоги и средини, меѓу кои:

• младински работници, младински лидери и социјални работници (платени или волонтери) кои работат со млади луѓе што се соочуваат со бариери,
• активисти и мултипликатори поврзани со младинска работа,
• креатори на политики и младински застапници,
• истражувачи кои работат на теми поврзани со инклузија, учество или млади,
• службеници за инклузија и разновидност од Националните агенции,
• претставници на младински организации, европски институции и мрежи.

Може да аплицирате доколку:

• имате искуство во областа на инклузија и разновидност во младинска работа или младински политики, и
• сте мотивирани да учите, придонесувате и активно да се вклучите во темата „Максимизирање на влијанието“.

Особено се охрабруваат апликации од лица со лично искуство со бариери за учество – социјални, економски, културни, географски или други. Вашата перспектива е суштинска. Форумот нема да биде целосен без разновидни гласови и реални животни искуства.

Практични информации

• Времетраење: 2.5 работни дена + пристигнување/заминување
• Пристигнување: 14 септември 2026 (пред вечера)
• Работни денови: 15–16 септември (целодневно)
• Заминување: 17 септември (половина работен ден; заминувања по ручек)

ЗА ЛОКАЦИЈАТА

Спортскиот центар Пајулахти (Liikuntakeskus Pajulahti) е единствениот официјален Олимписки и Параолимписки тренинг центар во Финска. Основан во 1929 година, денес претставува центар за врвни спортисти, студенти по спорт и рекреативни посетители, нудејќи разновидни тренинг капацитети и пристапност за пара-спортови, интегрирани со природното опкружување.

ТРОШОЦИ ЗА НАСТАНОТ:

Настанот ќе се реализира во периодот од 14-17 септември 2026 | Пајулахти, Финска

Принципот на покривање на трошоци е следниот:

Патните трошоци и сместувањето се покриваат од Националната агенција која испраќа учесници (во овој случај НА MK01);

Самиот учесник (индивидуално) учествува со 5% од висината на патниот билет (во вид на: билет за локален транспорт, патничко осигурување, итн...)

Крајниот рок за поднесување на апликации е 23.05.2026 година.

За аплицирање потребно е да ја пополните целосно апликацијата на следниов линк:

https://tcanetplatform.com/form/call-for-participants-inclusion?source_entity_type=group&source_entity_id=802#no-back

Забелешка: Известени и контактирани од страна на домакинот – организатор на транснационалната активност ќе бидат избраните учесници и на резервна листа

ОПШТИ МЕРКИ ЗА СПРЕЧУВАЊЕ НА КОРУПЦИЈАТА

Националната агенција за европски образовни програми и мобилност, во постапката за избор на 3 учесници на обуката и при извршување на договорите, ќе ги преземе сите потребни мерки со цел навремено откривање на корупцијата и отстранување или намалување на штетните последици од истата.Доколку постои основано сомнение во врска со корупција во постапката може да пријавите на следната е-пошта: ukazuvaci@na.org.mk и nepravilnosti@na.org.mk..