Еврогајденс центарот при Националната агенција за европски образовни програми и мобилност, согласно својата програма од месец март 2024 година, започна со креирање на стандарди и квалификации за кариерни советници. Оваа иницијатива е значаен чекор кон унапредување на системот за кариерно советување во нашата држава, кој ќе овозможи професионализација на оваа важна област.

Во текот на изминатата година беа организирани низа работилници со цел развој на стандарди и квалификации за кариерен советник. Работилниците, кои беа водени од страна на експертите на Еврогајденс центарот при Националната агенција, Флоријан Кадлеж од Европската тренинг фондација, како и меѓународните експерти за кариерно советување, др. Џенифер Меккензи од Ирска и претставниците на Асоцијацијата на советници за развој на кариера, имаа за цел да ги утврдат основите за новите стандарди.

На овие работилници учествуваа претставници од различни сектори и институции кои се клучни за полето на кариерно советување и насочување. Меѓу нив беа: Министерството за образование и наука, Министерството за социјална политика, демографија и млади, Агенцијата за вработување, Бирото за развој на образование, Центарот за стручно образование и обука, Центарот за образование на возрасни, Националниот младински совет на Македонија, Синдикатот за образование, наука и култура, Универзитетот Св. Кирил и Методиј, Одборот на работодавачи и други релевантни актери.

Работилниците се одржуваа како онлајн, така и со физичко присуство, а нивното траење беше неколку денови, што овозможи темелно разгледување на потребите и предизвиците во областа на кариерното советување. Во текот на овие средби беа развиени стандарди и квалификации за кариерен советник, прилагодени за различни таргет групи, вклучувајќи млади лица, лица со попреченост, лица од рурални средини, лица со помали можности, лица кои не се вклучени на пазарот на труд, возрасни лица, како и деца во редовно образование во основно и средно училиште и на универзитет.

На последната работилница, беше усвоен и Кодексот за кариерен советник, што претставува еден од клучните моменти во процесот на дефинирање на професионалните стандарди. Истовремено, беа организирани работни средби за презентација на остварените резултати, при што се презентираше работата пред Министерството за образование и наука, Министерството за социјална политика, демографија и млади, како и Одборот за Национална рамка на квалификации.

На состанокот во Министерството за образование и наука беа предложени измени на Законот за средно образование, конкретно во делот кој се однесува на кариерните советници. Во рамки на оваа иницијатива, беа изготвени и два правилника: еден за работните задачи на кариерните советници во средните училишта, и вториот за изборот и селекцијата на кариерни советници.

Следната фаза од проектот ќе вклучува адаптација на стандардите и квалификациите за кариерни советници, како и нивно внесување во регистарот за квалификации и регистарот на занимања. Со ова, ќе се овозможи официјализација и признание на новите професионални квалификации, што ќе придонесе за унапредување на системот за кариерно советување во земјата.

Еврогајденс центарот и во иднина ќе се стреми кон континуирано унапредување и развој на системите за поддршка на кариерното советување, со цел да обезбеди повисок степен на ефикасност и квалитет во процесот на поддршка за сите таргет групи.